The convocation of 1485

Summary

The bishop of Winchester's commission to the archdeacon of Surrey

[23v] Willelmus, permissione divina Wintoniensis episcopus dilecto nobis in Christo filio Olivero, artium magistro, archidiacono nostro Surriae vel eius officiali salutem, gratiam et benedictionem. Literas reverendi in Christo patris ac domini Domini Thomae, Dei gratiae Londoniesnsi episcopi, quinto die instantis mensis Ianuarii [5 January 1485] recepimus in haec verba: Reverendo in Christo patri ac domino Domino Wille lmo, Dei gratia Wintoniensi episcopo, Thomas, permissione divina Londoniensis episcopus, salutem et fraternae dilectionis continuum incrementum. Literas reverendissimi in Christo patris ac domini Domini Thomae, Dei gratia tituli Sancti Ciriaci in Thermis sacrosanctae Romanae ecclesiae presbyteri cardinalis, Cantuariensis archiepiscopi, totius Angliae primatis et apostolicae sedis legati, duodecimo die instantis mensis Decembris in haec verba recepimus:

Thomas, miseratione divina tituli Sancti Ciriaci in Thermis sacrosanctae Romanae ecclesiae presbyter cardinalis, Cantuariensis archiepiscopus, totius Angliae primas et apostolicae sedis legatus, venerabili fratri nostro Thomae, Dei gratia Londoniensi episcopo, salutem et fraternam in Domino caritatem. Literas domini nostri regis sigillo suo sigillatas nuper recepimus in haec verba:

Richardus, Dei gratia rex Angliae et Franciae et dominus Hiberniae reverendissimo in Christo patri Thomae cardinali archiepiscopo Cantuariensi totius Angliae primati salutem. Quibusdam arduis et urgentibus negotiis nos securitatem et defensionem Ecclesiae Anglicanae ac pacem, tranquillitatem, bonum publicum et defensionem regni nostri et subditorum nostrorum eiusdem concernentibus, vobis in fide et dilectione quibus nobis tenemini rogando mandamus quatenus praemissis debito intuitu attentis et ponderatis universos et singulos episcopos vestrae provinciae ac decanos et priores ecclesiarum cathedralium, abbates et priores et alios electivos, exemptos et non exemptos, necnon archidiaconos, capitula, conventus et collegia totumque clerum cuiuslibet diocesis eiusdem provinciae ad comparendum coram vobis in ecclesia cathedrali Sancti Pauli Londoniarum, vel alibi prout melius expediri videritis, cum omni celeritate accommoda, modo debito convocari faciatis, ad tractandum, consentiendum et concludendum super praemissis et aliis quae sibi clarius exponent tune ibidem ex parte nostra, et hoc sicut nos et statum regni nostri ac honorem et utilitatem ecclesiae praedictae diligitis nullatenus omittatis. Teste meipso apud Westmonasterium, septimo die Decembris anno regni nostri secundo [7 December 1484].