The convocation of 1453

Summary

Acts of the convocation

[219r] Convocatio praelatorum et cleri Cantuariensis provinciae facta per reverendissimum in Christo patrem et dominum Dominum Iohannem, Dei gratia episcopum Sanctae Rufinae sacrosanctae Romanae ecclesiae cardinalem, archiepiscopum Cantuariensem, totius Angliae primatem et apostolicae sedis legatum, in ecclesia Sancti Pauli Londoniarum, septimo die mensis Februarii anno Domini MCCCCLIIdo [7 February 1453], indictione prima, pontificatus sanctissimi in Christo patris et domini nostri, Domini Nicholai divina providentia papae quinti,

anno sexto inchoata, et usque ad et in tertium diem mensis Martii proximum extunc sequentem de diebus in dies continuata.

The archbishop's mandate containing the royal writ

Sequitur primo tenor commissionis reverendo in Christo patri Thomae, Dei gratia Londoniensi episcopo, ad convocandum ceteros praelatos et clerum Cantuariensis provinciae per dictum reverendum in Christo patrem in hac parte.

Iohannes, miseratione divina episcopus Sanctae Rufinae sacrosanctae Romanae ecclesiae cardinalis, archiepiscopus Cantuariensis, totius Angliae primas et apostolicae sedis legatus, venerabili confratri nostro Domino Thomae, Dei gratia Londoniensi episcopo, salutem et fraternam in Domino caritatem. Literas domini nostri regis sub privato sigillo suo sigillato nuper recepimus in haec verba:

Henricus, Dei gratia rex Angliae et Franciae et Dominus Hiberniae venerabili in Christo patri Iohanni, eadem gratia archiepiscopo Cantuariensi, totius Angliae primati, salutem. Pro quibusdam arduis et urgentibus negotiis nos, statum regni nostri ac honorem et utilitatem Ecclesiae Anglicanae intime concernentibus, vobis in fide et dilectione quibus nobis tenemini rogando mandamus, quatenus praemissis debito intuitu attentis et ponderatis, universos et singulos episcopos Cantuariensis provinciae, ac decanos et priores ecclesiarum cathedralium, abbates et priores, ac alios electivos, exemptos et non exemptos, necnon archidiaconos, capitula, conventus et collegia, totumque clerum cuiuslibet diocesis eiusdem provinciae, ad comparendum coram vobis in ecclesia cathedrali Sancti Pauli Londoniarum, vel alibi, prout melius expediri videritis, cum omni celeritate commoda more solito convocari faciatis, ad communicandum, tractandum, consentiendum et concludendum super praemissis et aliis quae sibi clarius exponentur tune ibidem ex parte nostra, et hoc sicut nos et statum dicti regni nostri ac honorem et utilitatem ecclesiae praedictae diligitis, nullatenus omittatis. Datum in manerio nostro de Sheen, decimo quinto die mensis Decembris anno regni nostri tricesimo primo [15 December 1452].