The Convocation of 1414

Summary

The papal summons to the council of Constance

Reverendo in Christo patri ac domino Domino Philippo, Dei gratia Lincolniensi episcopo, Richardus, permissione divina Londoniensis episcopus, salutem et sincerae dilectionis continuum incrementum. Literas venerabilium et religiosorum virorum prioris et capituli ecclesiae Christi Cantuariensis (sede ibidem vacante) nuper recepimus in haec verba:

Reverendo in Christo patri Domino Richardo, Dei gratia Londoniensi episcopo, Iohannes, permissione divina prior et capitulum sanctae Cantuariensis ecclesiae (sede ibidem vacante) reverentiam cum honore et prosperitatis continuo incremento. Literas sanctissimi in Christo papae et domini nostri, Domini Iohannis, divina providentia papae XXIII, recolendae memoriae Domino Thomae Arundel, ultimo archiepraesuli et pastori nostro defuncto, pridem dum vixit, transmissas, et ante mortem eiusdem, prout per ipsius tune cancellarii et aliorum clericorum suorum relationem fidelem didiscimus minime executas, post mortem suam in ipsius archivis, inter registra et alia munimenta sua comperimus, tenorem qui sequitur continentes:

Iohannes episcopus, servus servorum Dei, venerabilibus fratribus archiepiscopo Cantuariensi, eiusque suffraganeis ac dilectis filiis Cantuariensibus et ceterarum ecclesiarum capitulis, necnon abbatibus provinciae Cantuariensis, exemptis et non exemptis, ac ordinis cuiuscunque, salutem et apostolicam benedictionem. Ad pacem et exaltationem ecclesiae, ac tranquillitatem populi Christiani, prompto corde et efficaci desiderio intendentes, ea libenter ordinamus et quaerimus, per quae huiuscemodi pax, exaltatio et tranquillitas merito valeat provenire. Dudum siquidem felicis recordationis Alexander papa quintus, praedecessor noster, sacro generali concilio Pisano tune praesidens, ex quibusdam magnis et arduis negotiis ipsum moventibus, ipso approbante concilio, inter cetera decrevit iterum generale concilium extunc ad triennium per se vel successorem suum in loco, de quo sibi vel eidem successori videretur, fore solemniter convocandum; idemque praedecessor ea, quae circa reformationem ecclesiae expedienda restabant, protunc suspendit, ipsumque concilium usque ad tempus triennii praefatum continuandum statuit et prorogavit. Postmodum vero ipso Alexandro praedecessore, sicut Deo placuit, vita functo, nobisque divina favente dementia ad apicem summi apostolatus assumptis, cum tempus eiusdem triennii iam adventaret, et nos per vestigia eiusdem praedecessoris incedere, ac ordinationem praefatam ab eo in concilio factam, ut praefertur, puro corde et recta voluntate adimplere properaremus, quibusdam rationibus tune expressis, animum nostrum moventibus, concilium huiuscemodi in Romana urbe, quae paulo ante de manibus hostium recuperata praesentiam nostram pro eius conservatione plurimum flagitabat, debito tempore convocavimus.