The Convocation of 1314
Published online by Cambridge University Press: 10 January 2024
Summary
Mandate to the bishop of Durham for a convocation on 3 June
Willelmus, permissione divina Eboracensis archiepiscopus, Angliae primas, venerabili fratri Domino Richardo, Dei gratia Dunelmensi episcopo, suffraganeo nostro, salutem et fraternae caritatis in Domino continuum incrementum. Literas serenissimi principis et domini nostri Domini Edwardi, Dei gratia regis Angliae illustris quinto Kalendarum Maii [27 April 1314] apud Burnby nostrae dioecesis recepimus tenorem qui sequitur continentes:
Edwardus, Dei gratia rex Angliae, dominus Hiberniae et dux Aquitaniae venerabili in Christo patri Willelmo, eadem gratia archiepiscopo Eboracensi, Angliae primati, salutem. Crescente malitia Roberti de Brus et complicium suorum inimicorum et rebellium nostrorum, qui non modicas partes marchiae regni nostri et ecclesiam sanctam in eisdem partibus sub tributo per tempus aliquod posuerunt, et iam de novo castra, villas et fortalicia in terra nostra Scotiae et marchia praedictis hostiliter occuparunt, et eadem castra villas et fortalicia, necnon et ecclesias, oratoria et alia loca sacra in terra et marchia praedictis devastarunt, fideles nostros in dictis castris, villis et fortaliciis inventos nequiter interficientes, et aliorum utriusque sexus innocentium sanguinem effundere non verentes, et tot et tantis facinoribus non contenti usque ad villam nostram de Berwick super Twedam et alia loca infra dictam terrain nostram Angliae ad huiusmodi mala et peiora pro suis viribus perpetranda, cum magna multitudine armatorum accedere iam festinant pro salvatione dictae villae de Berwick et aliarum villarum et locorum nostrorum ac etiam ecclesiarum in terra et marchia praedictis ac fidelium nostrorum in eisdem, et pro repulsione dictorum inimicorum et rebellium nostrorum, ordinavimus et esse proponimus, Deo dante, apud Novum Castrum super Tynam a die Paschae proximo futuro in tres septimanas [28 April 1314] cum equis et armis ad profic[isc]endum exinde contra dictos inimicos nostros ad eorum obstinatam malitiam, cum Dei adiutorio, refrenandum viriliter et potenter.
- Type
- Chapter
- Information
- Records of Convocation , pp. 3 - 8Publisher: Boydell & BrewerFirst published in: 2024