16 - Ngomz’omdaladala kaGrout

Summary

O Groutville, muz’ omdala kaGilawoti!

Nawe zakusela izinsuku msuku.

Kusabus’ obabamkhulu bebodwa.

Kuthiw’ injobo babeyithungel’ ebandla,

Bengenjengathi esiyithunga sisodwa

Sihlez’ ezigqikini nasezincansini

Bon’ abangazange bazithi shazi.

Ngendaba sesitshelw’ amandla

Kuthiwa kwakubuswa kulezo nsuku.

Kwakusekhona nezitetelegu ndini

Enzalo yazo siyibona ngolugazi.

Wo, zidlule lezo nsuku muzi kaGilawoti!

Lo kwakumuz’ owawuvunganyelw’ indlovu

Phansi koMakhabeni, likhoth’ oNdlovu,

Kusekhon’ amahlath’ anamahlozi,

Kungamangalisi ingwe eyingozi

Ikubhozomela, ikwenekele phansi.

Nanka amasim’ omhlanga elucansi,

Esikaza nomoba ay’ ashay’ eMvoti

Omanzi aw’ anehlimbithw’ angan’ amtoti,

Agudle njengomqhumo wasemthimbeni

Ephahle la nangal’ amanzi nob’ ephandle,

Kuhelisene kuyolwandle njengomthimba.

Azisekh’ iziziba zakho Mvoti,

Amaqhikiza nezintombi zakho

Ezazibhidla nje zishay’ intshiki kuzo.

Alisekh’ itsh’ elikhulu lokugxuma

Laph’ izinsizwa namagawu bezothi

Zingene ngenhloko zidl’ umtshuzo

Kuhle kwezingxangxa namadwi.

Amagagasi abengelutho, noma

Bewasika abesikeka dweshu.

Hhayi kungenjengansuku zanamuhla,

La sithontel’ inhlabathi yonk’ imihla

Namanz’ engenabo lobo bumtoti.

Uma besekhon’ abathi “Guga mzimba!”

Nathi kufanele sithi “Guga Mvoti!”

Kungaze kuthiwe “Guga”, la kungase

Kwenzeke yini khona lokho uma kuse –

Khona namatsh’ esiShaka singashaywa?

Konje ukhon’ umuz’ ongashingiphala

Ngoba uthi won’ unganywe ngangcono

Amathongo angadlula okaMenzi?

Phezulu kwayo indlu yezinhlakanipho,

Emqongweni wamagquma kaMandelu,

Wena Nodumehlezi wawehla njalo;

Nathi sike sihlangane nawe sibone.

Wawudabul’ amanz’ aseMvoti,

Ugudl’ amagqum’ aseZenzeleni,

Nakh’ ukhwel’ ukhal’ oluseMnyundwini

Ngezansi kweziwa zakwaManzasengwa.

Lapha wawuy’ uthi voshosho uphuze

Ngothi lwesijula emingamanzini.

Eyethile ithakac’ izandla phansi.

Umzila nomkhondo wezinyamazane:

Izimbabala, nonkonka, nemigakla,

Udobel’ amehlo phakathi ehlathini.

Wen’ oyinkonyane kaSenzangakhona,

Wawubuk’ uhleke, konke kungokwakho.

Um’ amanz’ ampof’ esekungen’ umthambo,

Izinjuqu zezinsizwa zikaZulu

Zazikuphasa ngalapha nangalapha,

Zikutatamise zikukhuphulele

Phezu kwedwala lamadlozi awoXaba

Alimbela ngaphansi kwaMhlaba, athi

Liyoba umgqiki nembeleko yakho

Laph’ ubuk’ izinkomo namankonyane

Zabantwanyana nezinkedama zakho.

Izinkophe zobukhosi bakho Zulu

Ziyasesabisa, zesabis’ obabamkhulu;

Zibuk’ oNtaba, zibuk’ oMqwebu,

Zibheke phans’ eNkobongo ngaseMhlali,

Kodw’ akuzwakali kusola, kuthe nya.

Zibuye zibhek’ uMkhwethu noGovu,

Zibabone belele noBantukabezwa;

Amagej’ omoba nezinqola zoNoqhomela

Zidlidla phezu kwabo: uthule kaNdaba!

Wawushilo khona bekugwaz’ oMbopha,

Benz’ uzungu noDingane noMhlangana,

Washo wathi ngeke libuswe, koba nje.

Abanye babasikibunda baseMvoti

Baqinisa begomel’ okwesibawu,

Bayasho bath’ ukhon’ ulele kulo

Labo lezinwel’ eziluhlaza cwephe;

Kodwa kakukho natshe abaholi bethu

Abalenze laba umcamelo wentamo

Yakho eyagebis’ oMbuyazi weTheku,

Yaze yavum’ oFebana kaMjoji

Behlangene ngamakhanda eMtateni

Kanye noDumase, noWohlo, noPhobana.

Bath’ ulele phansi kwemisilinga

Namatshan’ uDukuz’ awanqwab’ eduze.