Statutes

Summary

STATUTA AULÆ DIVÆ CATHARINÆ

In nomine Sanctæ & Individuæ Trinitatis Patris et Filii et Spiritus Sancti.

Ego Robertus Woodlarke sacræ theologiæ professor, Domini in me benignitatem ob oculos habens, ex iis quæ mihi ex Domini benedictione contigerunt, Collegium unum sive Aulam, quod Collegium sive Aula divæ Catharinæ Virginis nominabitur, ad laudem gloriam & honorem Domini nostri Jesu Christi, ecclesiæ suæ utilitatem, sacrosancti verbi Dei administrationem, ad sacræ theologiæ, philosophiæ, cæterarumque artium cognitionem amplificandam in Universitate Cantabrigiæ erexi fundavi et stabilivt, licentia regia ad id obtenta, prout in ordinationibus et statutis hujus rei gratia confectis plenius apparebit. In quo Collegio magistrum seu præfectum unum, socios sex plures vel pauciores pro ratione proventuum dicti Collegii futuris temporibus esse volumus perpetuo duraturis; et pro ejusdem Collegii salutari regimine et gubernatione statuta et ordinationes quasdam quæ pietatem et bonas literas promovere posse nobis videntur, non sine doctorum et prudentium virorum consilio promulgata ea qua sequuntur forma fundatoria authoritate sancimus, et ab omnibus ejusdem Collegii membris sub juramenti religione inviolabiliter servari volumus.

De Officio Magistri.

Imprimis statuimus & ordinamus quod in dicta aula divæ Catharinæ sit unus superior, qui magister seu custos appelletur, qui sit famæ integræ et honestæ conversationis, vita ac moribus probatus, doctrina et rerum usu atque experientia valens, ætatis ad minimum triginta annorum atque idem sacræ theologiæ professor, aut saltem baccalaureus in eadem.