Royal Letters

Summary

Jacobus Dei gratia, &c. &c. omnibus ad quos præsentes Literæ pervenerint Salutem. Inspeximus Literas quasdam patentes illustrissimæ Principis Reginæ Elizabethæ sacratæ memoriæ predecessoris nostri in gratiam Collegii nostri Sancti Petri Westmonasterii et Discipulorum et Alumnorum nostrorum Regiorum ibidem in scholâ nostrâ dicti Collegii nostri educatorum factas et concessas in hæc verba.

Elizabetha Dei gratia Angliæ, Franciæ et Hiberniæ Reginæ, Fidei defensor, &c. omnibus ad quos præsentes literæ pervenerint Salutem.

Inspeximus literas nostras patentes et manu nostra signatas et magno sigillo Angliæ sigillatas Magistro et Sociis Collegii Sanctæ et Individuæ Trinitatis Cantabrigiæ directas in hæc verba. Elizabetha Dei gratia &c. dilectis nobis Magistro et Sociis Coll: Sanct: et Indiv: Trin: Cant: salutem in Christo Salvatore. Rex præstantissimus et celeberrimæ memoriæ Pater noster Henricus Octavus Collegium vestrum ornatissimum Sanctissimæ et Individuæ Trinitati consecratum amplissimis possessionibus locupletavit. Nos autem partim ad literas et pietatem respectum habentes partim egregium excellentissimi Patris nostri propositum ad exitum producere cupientes saluberrimas leges et institutiones eidem Coll: vestro nuper dedimus, quarum præscripto rerum vestrarum status dirigeretur; in quibus hoc inter cætera positum est ut ex Westmonasteriensi schola nostra Discipuli vestri potissimum sumerentur, siquidem ad id apti forent; verum qua via hæc Electio procederet cum in vestris Statutis non ostendatur; omnino volumus eandem hac in re rationem observari quam in Westmonasteriensi isto Statuto sequente collocavimus quod inscriptum est “De Duplici Discipulorum Electione;” quapropter vobis permittimus et etiam præcipimus ut in hoc scholasticorum virorum delectu Statutum illud Westmonasteriense quod ante commemoravimus sequamini.