The convocation of 1512

Summary

The archbishop's mandate for the convocation

Richardus, permissione divina Londoniensis episcopus venerabili viro Magistro Thomae Hannibal legum doctori, reverendi in Christo patris et domini Domini Silvestri, eadem permissione divina Wigorniensis episcopi in remotis agentis, in diocesi sua Wigorniensi vicario in spiritualibus generali, salutem, gratiam et benedictionem. Literas reverendissimi in Christo patris et domini Domini Willelmi, permissione divina Cantuariensis archiepiscopi, totius Angliae primatis et apostolicae sedis legati, quinto die subscripti mensis Decembris [5 December 1511] noveritis nos cum ea qua decuit reverentia recepisse verborum sequentium sub tenore:

Willelmus, permissione divina Cantuariensis archiepiscopus, totius Angliae primas et apostolicae sedis legatus, venerabili fratri nostro Richardo, Dei gratia Londoniensi episcopo salutem et fraternam in Domino caritatem. Literas domini nostri regis sigillo suo sigillatas nuper recepimus in haec verba:

Henricus, Dei gratia rex Angliae et Franciae et dominus Hiberniae, reverendissimo in Christo patri Willelmo, eadem gratia archiepiscopo Cantuariensi, salutem. Quibusdam arduis et urgentibus negotiis nos securitatem et defensionem Ecclesiae Anglicanae ac pacem, tranquillitatem, bonum publicum et defensionem regni nostri et subditorum nostrorum eiusdem concernentibus, vobis in fide et dilectione quibus nobis tenemini rogando mandamus quatenus praemissis debito intuitu attentis et ponderatis universos et singulos episcopos vestrae provinciae ac decanos et priores ecclesiarum cathedralium, abbates et priores et alios clericos, exemptos et non exemptos, necnon archidiaconos, capitula, conventus et collegia, totumque clerum cuiuslibet dioceseos eiusdem provinciae ad comparendum coram vobis in ecclesia Sancti Pauli Londoniarum vel alibi, prout melius expediri videatis, cum omni celeritate accommoda, modo debito convocari faciatis ad tractandum, consentiendum et concludendum super praemissis et aliis quae sibi clarius exponentur tune ibidem ex parte nostra. Et hoc sicut nos et statum regni nostri ac honorem et utilitatem ecclesiae praedictae diligitis, nullatenus omittatis. Teste meipso apud Westmonasterium vicesimo octavo die Novembris anno regni nostri tertio [28 November 1511].

Quocirca fraternitati vestrae committimus et mandamus quatenus omnes et singulos dictae ecclesiae nostrae Cantuariensis suffraganeos infra dictam nostram Cantuariensem provinciam constitutos ac absentium episcoporum vicarios in spiritualibus generales, citetis peremptorie.