2. - Edition and Translation

Summary

[A^ra] “[…] et tes genz? Ne saras venir a la bataille que tu n’i truises le roi Artu et le roi Bans, et li rois Bohorz a tout grant gent qu’il ont amenez del roiaume de Logres.”

[Q]uant Leonces entent celui qui si a parlé a lui, si le regarde et voit que ce est Merlin. Si le conout et li vet, les braz tenduz, et l’acole et enbrace, et li fet merveilleuse feste et li dist que bien soit il venuz, et autresi fait Phariens. Et quant il orent assez conjoï, si lor demandent noveles de lor seigneur, et il leur dit que par tans les porroient vooir come del plus preudomes del monde, “et chevauchent a grant efforz. Et vous alez, si devisez vos genz en quatre parties, et ait en chascune v^m homes. Et vos metez au chemin demein a soir, si que vos soiez au siege a l’ajornee. Et sachiez que vos i troveroiz une des greignors batailles que vos oncques veïssiez.” “Sire,” fet Leonces, “a qui volez vos que je les baille a conduire?” “A vos iiii qui ci estes” fait il “qui estes sires et mestres. Si ait Antiaume la premiere, et Grassiens l’autre, et Phariens la tierce, et vos aiez la quarte. Et je vos conduirai jusqu’en l’ost.” “Sire,” fet Leonces, “vostre merci! Or sai ge bien que nos ne ferons se bien non puisque nos serons en vostre conpaignie.” Atant s’en vont li iiii et devisent lor genz en quatre parties: si en prent li seneschaux vm et les sevre a une part, et Grassiens vm et se met de l’autre part, et Fariens vm autresi, et Leonces remest en la piece de terre et fist sa gent molt bien apareiller et molt bien armer, qui bien furent vm et plus. Et li iautre se logierent a une part chascun par soi a toute lor gent, et sejornerent cel soir et l’andemein jusc’a l’esserir qu’il se mistrent au chemin tuit armé sor les chevaus et chevauchierent toute la nuit sans noise fere. Si ala Merlin tout devant, qui les conduisoit. Et ce fu le mardi devant la Seint Jehen, ce dit li conte, que les nuiz sont cortes come en esté el mois de juig, le grant mes.