The Convocation of 1403

Summary

The archbishop's mandate

Walterus, permissione divina Dunelmensis episcopus, dilecto filio priori ecclesiae nostrae Dunelmensis, salutem, gratiam et benedictionem. Literas reverendissimi in Christo patris et domini nostri Domini Richardi, Dei gratia Eboracensis archiepiscopi, Angliae primatis et apostolicae sedis legati, nuper recepimus, tenorem qui sequitur continentes:

Richardus, permissione divina Eboracensis archiepiscopus, Angliae primas et apostolicae sedis legatus, venerabili fratri nostro Domino Waltero, Dei gratia Dunelmensi episcopo, suffraganeo nostro, salutem et fraternam in Domino caritatem. Breve regium nobis nuperrime directum recepimus in haec verba:

Henricus, Dei gratia rex Angliae et Franciae et dominus Hiberniae venerabili in Christo patri Richardo, eadem gratia archiepiscopo Eboracensi, Angliae primati, salutem. Quibusdam arduis et urgentibus negotiis nos et statum regni nostri ac honorem et utilitatem Ecclesiae Anglicanae intime concernentibus, vobis in fide et dilectione quibus nobis tenemini rogando mandamus quatenus praemissis debito intuitu attentis et ponderatis, universos ac singulos episcopos Eboracensis provinciae, decanos et priores ecclesiarum cathedralium, abbates et priores et alios electivos, exemptos et non exemptos, necnon archidiaconos, capitula, conventus et collegia totumque clerum cuiuslibet diocesis vestrae provinciae ad comparendum coram vobis in ecclesia cathedrali Beati Petri Eboracensis, vel alibi prout expedire videritis, citra octabas Sancti Hilarii proximo futuras [20 January 1403] more solito convocari faciatis ad tractandum, concordandum, consentiendum et concludendum super praemissis et aliis quae sibi clarius exponentur tune ibidem ex parte nostra. Et hoc sicut nos et statum dicti regni ac honorem nostrum ac honorem et utilitatem ecclesiae praedictae diligitis nullatenus omittatis. Teste me ipso apud Westmonasterium quarto decimo die Decembris anno regni nostri quarto [14 December 1402].

Quocirca, reverende frater, tenore praesentium peremptorie vos citamus, ac priorem vestrae ecclesiae Dunelmensis et capitulum eiusdem, universosque abbates et priores, alios etiam electivos, exemptos et non exemptos, archidiaconos, decanos, capitula, conventus et collegia, clerumque huiusmodi per procuratores suos singulos, atque clerum per duos sufficientes procuratores et idoneos ab ipsis conventibus, capitulis, collegiis et clero legitime deputatos, die Lunae proximo post festum Sancti Hilarii proximo futuro [15 January 1403] in ecclesia nostra cathedrali Eboracensi coram nobis compareatis et compareant quilibet eorundem, super his quae pro defensione et salvatione ecclesiae et regni Anglicani et marchiarum huiusmodi (ut praefertur) exponi ibidem contigerit, nobiscum una cum aliis praelatis dictae nostrae provinciae, cum continuatione et prorogatione sequentium tune dierum praesentibus tractaturi, vestrum ac suum consilium sanum super praemissis et ea concernentibus impensuri, his etiam quae ibidem concorditer ordinari contigerit consensuri sicut et recepturi, quod huiusmodi convocationis negotia exigunt et natura.