The Convocation of 1391-2

Summary

The vicar-general's reply to the archbishop's mandate for the convocation,

Reverendo in Christo patri et domino Domino Thomae [Eboracensi archiepiscopo, Angliae primati et apostolicae sedis] legato, suus humilis et devotus filius Iohannes de Newton, vicarius vester in spiritualibus generalis et officialis curiae vestrae Eboracensis omnimodi reverentiam et honorem. Literas vestras reverendas nuper recepimus in haec verba:

Thomas, permissione divina Eboracensis archiepiscopus, Angliae primas et apostolicae sedis legatus dilecto filio officiali curiae nostrae Eboracensis salutem, gratiam et benedictionem. Quia ex causis variis ecclesiae statum et libertatem, cleri honorem et utilitatem ac rei publicae commodum et tranquillitatem concernentibus praelatos et clerum nostrarum diocesis, civitatis et provinciae decrevimus convocari ut super praemissis et ea convenientibus ad Dei laudem, morum reformationem et vitiorum extirpationem cum eisdem habere possimus consilium et tractatum, et nihilominus breve regium nobis nuperrime directum recepimus in haec verba:

Richardus, Dei gratia rex Angliae et Franciae et dominus Hiberniae venerabili in Christo patri Thomae, eadem gratia archiepiscopo Eboracensi, Angliae primati, salutem. Quia sicut satis clare scitis ad subeundem et supportandum sumptuosa et immensa onera quae nobis pro defensione et salvatione regni nostri ac ecclesiae sacrae post praesentes treugas et guerrarum abstimentias inter nos et adversarios nostros impune iunctas et signatas facere oportebit de bonis nostris absque fidelium ligeorum nostrorum adminiculo non sufficimus nee valemus vobis in fide et dilectione quibus nobis tenemini rogando mandamus quatenus praemissis debito intuitu attentis et ponderatis, suffraganeos vestros, decanos et priores ecclesiarum cathedralium, abbates et priores et alios electivos, exemptos et non exemptos, necnon archidiaconos, capitula, conventus et collegia totumque clerum cuiuslibet diocesis vestrae provinciae ad comparendum coram vobis in ecclesia cathedrali Beati Petri Eboracensis, die Lunae proximo post festum Sancti Clementis papae proximo futurum [27 November 1391] more solito convocari faciatis et ipsos in hac parte ex causa praedicta ad subsidium in hoc casu competens et necessarium in supportationem dictorum omnium nobis concedendorum eos specialius et efficacius quo magis sciveritis aut poteritis inducatis et partes vestras ad hoc diligenter et effectualiter apponatis. Nos in cancellaria nostra de quantitate subsidii illius et de terminis solutionis eiusdem sub sigillo vestro distincte et aperte certificantes. Et hoc sicut nos et honorem nostrum ac salvationem et defensionem ecclesiae catholicae ac regni praedicti diligitis nullatenus omittatis. Teste me ipso apud Westmonasterium septimo die mensis Octobris anno regni nostri quinto decimo [7 October 1391].