27 - Maskani Bora

Summary

• 1. Maskani, maskani mazuri

• 2. Lazima yawe na nafasi ya kutosha

• 3. Lazima yawe na hewa, furaha na amani

• 4. Lazima yawe na raha zote za maisha

• 5. Mahali pa starehe baada ya kazi ngumu ya mchana

• 6. Lazima yasijae tele watu

• 7. Tabia ya mapenzi, kusaidiana na ukunjufu

Kadiri yalivyo duni, hapana mahali kama maskani yetu. Tukiwa mbali na nchi yetu, mioyo yetu hulilia maskani yetu. Baada ya maisha ya ujasiri, furaha au kazi katika nchi ya mbali, roho zetu hutamani maskani yetu, haidhuru yakiwa mabaya, duni au mazuri. Kweli ni kwamba neno hili maskani lina haiba iondoayo mashaka na wasiwasi wote mioyoni mwetu. Kama maskani duni ya kawaida huweza kufanya mengi kama hayo, maskani bora huweza kufanya mengi mno kuliko hayo.

Heri tutazame twakusudia kusema nini juu ya maskani bora. Maskani bora si lazima kuwa kama Beti El Ajaib, yaliyopambwa kwa anasa au yaliyozungukwa na bustani nzuri. Maskani bora huweza kuwa hata nyumba ndogo yenye pambo la kufaa ndani yake. Katika maskani bora lazima pawe na nafasi ya kukaa. Fikiri hali ya jamaa wengi wakisongana pamoja katika nafasi ndogo nyumbani. Hasa nafasi hiyo hiyo ikilazimu kutumika kwa jiko, sebule, chumba cha kulala, chumba cha kusomea, msalani na kadha wa kadha wakati wote. Hapana hata nafasi ya kutosha watu wanne kulala vema. Lazima tuwe na chumba cha kulala, sebule ya kuketi, jiko na msalani. Lazima yawe na pambo la kupumbaza maisha pia. Lazima yawe na hewa, mwangaza mzuri na faraja.

Amani na faraja huungana na maskani. Twenda huko jioni tumechoka tena taabani baada ya kazi ngumu kwa matumaini ya kustarehesha viungo vyetu vilivyochoka tukapate amani na raha. Mahali pakiwa na kelele, hapana raha wala buraha. Tukifunga milango yetu tukaketi pamoja wote kwa muda wa saa chache kila siku, twafaidi maisha na faragha. Kwa bahati mbaya nyumba kama zile zipangishwazo mijini hazina nafasi ya kutosha kwa mambo kama haya.

Katika maskani bora lazima tupate raha zote za maisha. Tuwe na watumishi kwa kazi za nyumbani, tukiweza kuwaajiri. Lakini watu wasijae tele. Jamaa ya Mwafrika imezoea kuwa kundi kubwa. Mke, watoto, wajukuu, wazee, wajomba, mashangazi na wengine katika nyumba moja isiyo nafasi. Haya si maskani bora hata kidogo. Amani na furaha itapatikana wapi katika umati kama huu?

Hapana haja ya kusema kwamba maskani bora lazima yawe safi na nadhifu. Mtu hawezi kupata faraja wala starehe katika nyumba chafu na mbaya.