42 - Kusudi Langu Katika Maisha

Summary

• 1. Kusudi langu kubwa

• 2. Nachagua uandishi nipate kusudi langu

• 3. Mashaka ya uandishi na saburi

• 4. Kunyonya maarifa kwa matiti badala ya chupa

Kila mtu duniani, kadiri alivyo mdogo au mkubwa, ana kusudi lake katika maisha. Mwana wa mfalme aweza kuwa na kusudi la kuwa mfalme, na mfalme aweza kuwa na kusudi la kuwa mfalme mkuu. Jemadari akusudia kuwa amirijeshi, na askari akusudia kuwa jemadari. Kusudi la fulani ni kupata sifa, fulani kupata uwezo, fulani kupata utajiri na fulani kutaka elimu.

Mambo yakiwa hivi, hata mimi nina kusudi langu katika maisha, ingawa sijui nitajaliwa kulipata lini. Sitaki kutafuta fedha, wala heshima au umaarufu upatikanao bila shida. Kusudi langu katika maisha ni kujipatia mimi mwenyewe na wenzangu furaha. Kupata kusudi hili nimeazimu kuwa mwandishi na kutumia maisha yangu katika kusaidia wasomaji. Naamini kwamba nimefanya uchaguzi mwema. Nikiwa Mwandishi wa maana, nitapata fedha ambayo nitatumia kwa kufadhili maskini. Sitaandika kazi hafifu; na bora nitazojaliwa kuandika sitauza kwa thamani kubwa. Kazi zangu zitakuwa bora lakini rahisi kununulika ili zisaidie jitihadi ya kupigana na ujinga. Nikijaliwa kuwa mwandishi hodari, hapana shaka nitapata sifa na umaarufu, kwa sababu nitazungumza na ulimwengu badala ya watu wachache. Lakini nitajihadhari nisighurishwe na kiburi kwa sababu ya sifa hii. Uandishi ni kazi ya unyenyekevu. Haja niliyo nayo ni kusema fikira zangu na kuacha wasomaji waamue. Sitakuwa mwamuzi wa kazi zangu. Nikifunguliwa heri na kazi zangu zikienea kila pembe, neno gumu kupatikana ingawa nalitamani, hapana budi nitapata uwezo na maongozi. Lakini nitajihadhari nisiharibu uwezo wangu kwa kuandika kazi yoyote ya aibu au isiyostahili. Kwa ufupi, nimekusudia sana kuwa mwandishi, si kwa sababu ni kazi ambayo itaniletea utajiri, sifa au uwezo mkubwa mno kuliko kazi nyingine yoyote, ila kwa sababu ina nafasi bora na kubwa sana za kutumikia watu katika pigano la kila siku la elimu na ujinga.

Mwandishi akipanda mbegu yake mara moja hapana kiangazi kiwezacho kukausha wala masika yawezayo kutotesha mmea wake. Kwa mtu mnyonge kama mimi, kazi gani nyingine bora kuliko hii? Ila za uandishi ni kwamba hauna mazao ya haraka. Mashaka mengi yatapasa kuvumiliwa. Naweza kuishi nikafa bila kuona mavuno yake lakini pana hakika ya kupatikana nipo au sipo duniani. Naomba nijaliwe saburi ya manabii wakati kazi zangu zikikataliwa lakini nisiache kusudi langu.